საქართველო იმ ქვეყნების ტოპ–ხუთეულში შედის, რომელთა მოქალაქეებიც თურქეთში უკანონო სამუშაოებზე ყველაზე ხშირად იმყოფებიან. ინფორმაციას ამის შესახებ ekonomi.haberturk.com ავრცელებს.

საქართველოს გარდა ხუთეულში რუსეთი, თურქმენეთი, აზერბაიჯანი და უკრაინაა. თურქეთის შრომისა და სოციალური უზრუნველყოფის სამინისტროს მონაცემებით, გასულ წელს ქვეყანაში უკანონოდ დასაქმების 3 ათასზე მეტი შემთხვევა გამოვლინდა, თუმცა რეალურ მონაცემებს ეს რიცხვი არ ასახავს.

1 თებერვლიდან თურქეთში ქვეყანაში უკანონოდ დასაქმებულთა რაოდენობის შესამცირებლად ჯარიმები დაწესდა, რომელთა თანახმადაც, უცხოელს, რომელსაც მუშაობის ნებართვა არ ექნება, 795 ლირით (დაახლოებით 700 ლარი) დააჯარიმებენ.

შრომითი დასაქმების ნებართვის მისაღებად კი, დაინტერესებულმა პირმა შრომისა და სოციალური უზრუნველყოფის სამინისტროს სპეციალურ განყოფილებას უნდა მიაკითხოს, სადაც გარკვეული საზღაურისა და დამსაქმებლის განაცხადის საფუძველზე ნებართვები გაიცემა.