ისრაელში ვიზიტით მყოფი საქართველოს კათალიკოს-პატრიარქი ილია მეორე ებრაელ ბიზნესმენებს რონი ფუქსსა და ზეევ ფრენკელს შეხვდა.

ამის შესახებ განცხადება საქართველოში ზემოხსენებული ბიზნესმენების ადვოკატმა და „ქართული ოცნების“ პოლიტიკური საბჭოს წევრმა არჩილ კბილაშვილმა გააკეთა. კბილაშვილის თქმით, შეხვედრას თავადაც დაესწრო. „ბიზნესმნებს სურდათ, რომ პატრიარქისთვის მადლობა პირადად გადაეხადათ და სურდათ, რომ მეც იქ ვყოფილიყავი“, - აღნიშნა კბილაშვილმა. შეხვედრა ბიბლიური მეფე დავითის საფლავთან შედგა.

როგორც ცნობილია, ზემოხსენებული ისრაელელი ბიზნესმენები საქართველოში მაღალჩინოსნის მოქრთამვის ბრალდებით იხდიდნენ სასჯელს, თუმცა მათ ბრალი არ აღიარეს.

ისრაელში ილია მეორის ვიზიტი 25 თებერვალს დასრულდება.